Hvert er leyndarmál Finna er kemur að menntamálum?

Bryndís Schram og Jón Baldvin hafa mikið rætt um velgengni Finna í menntamálum eftir heimkomuna frá Finnlandi og áður Bandaríkjunum.  Finnar hafa náð einstæðum árangri í menntamálum og hafa t.d. komið afar vel út úr alþjóðlegum könnunum, svo sem Pisa könnuninni, á hæfni nemenda í stærðfræði.  Það áhugaverða við þennan árangur er að þeir virðast ekki eyða meiri peningum í menntakerfið en önnur ríki OECD.   Lítum fyrst aðeins á samanburðinn á árangri þjóða OECD í Pisa könnuninni:

 

 

 

 

 

 

 

 

 

 

 

 

 

 

 

Performances on the mathematics scale in PISA 2003.  Standard erros are indicated on the graph by the figures in brackets

Heimild:  Smellið hér

Eins og sést á þessari töflu standa finnskir nemendur sig best af ríkjum OECD í stærðfræði í þessari  könnun.  Almennt standa Norðurlönd sig vel og eru öll í efri hópnum en Noregur er á mörkunum. Ísland stendur sig ágætlega í þessum samanburði þó langt sé í frændur okkar Finna.  Sérstaklega athygli vekur slæm frammistaða nemenda í Bandaríkjunum sem lenda í sjötta neðsta sæti og eru í hópi með ríkjum eins og Mexíco, Tyrklandi, Grikklandi, Ítalíu og Portúgal.

En lítum næst á hvað ríkin eru að eyða í menntakerfið:

 

 

 

 

 

 

 

 

Total expenditure on educational institutions for all levels of education. As a percentage of GDP

Heimild:  Smellið hér 

Hér er verið að bera saman heildarútgjöld til menntamála (bæði opinbert fé og einkafé) sem hlutfall af landsframleiðslu.  Eins og sést á grafinu þá eru Finnar undir meðaltali OECD er þetta varðar.  Það virðist því vera sem árangur þeirra sé ekki útaf því að þeir séu að eyða svo miklu í menntakerfið heldur virðist orsökin liggja í einhverju öðru.   Athygli vekur að samkvæmt þessu virðast Ísland og Bandaríkin eyða hvað mestu í menntamál af ríkjum OECD en hafa verður í huga að inn í tölum Bandaríkjanna er bæði hið opinbera og einkaskólarnir.   Engu að síður hlýtur þetta að vekja upp spurningar um árangur menntakerfisins í Bandaríkjunum.  Þeir eyða hvað mestu í menntun en uppskera ekki samkvæmt því, eru í neðri deildinni hvað árangur varðar.   Finnar aftur á móti eyða mun minna í þennan málaflokk en eru að ná hvað bestum árangri.

Ef ég væri menntamálaráðherra myndi ég kynna mér rannsóknir á því af hverju Finnar ná svona miklum árangri.  Þeir hljóta að vera spennandi fyrirmynd í þessum málum, sérstaklega þar sem þeir virðast nýta féð sem sett er í málaflokkinn mjög vel..... 

Athugasemdir

[Hafsteinn Karlsson, 21.2.2007 kl. 10:24]

Sæll

Já þetta er vissulega áhugavert. Málið er hins vegar mjög flókið. Finnar hafa sjálfir ekki svar við velgengni sinna í þessum könnunum. Rannsóknir eru afar takmarkaðar. Líklegt er að margir þættir spili inn í. S.s. hversu virðing fyrir menntun og skólum er inngróin í menninguna, allir kennarar eru með meistarapróf o.fl. Kannski er könnunin sjálf þannig uppbyggð að hún henti finnskum skólabörnum vel. Kennsla sé þannig að hún henti vel í staðreyndakannanir. 

Sjálfur er ég hér út í Finnlandi að skoða skólakerfið og kannski finn ég leyndardóminn. Læt þá vita af því.  

[Sigfús Þ. Sigmundsson, 21.2.2007 kl. 10:33]

Já, láttu okkur endilega vita ef þú finnur svarið ;)   En ég hef einmitt heyrt þetta með menntunina, þ.e. að hátt hlutfall kennara sé með meistarapróf.  Kannski liggur stór hluti skýringarinnar þar?  Hver veit? 

Ég hef einnig heyrt kenningu um jöfnuð í Finnlandi og jafnræði í skólakerfinu.  Kannski ekki eins fast í hendi og hitt....

[Tryggvi Már Gunnarsson (IP-tala skráð) 21.2.2007 kl. 20:44]

Sæll Sigfús. Þú mættir gjarnan tékka á fleiri þáttum PISA en stærðfræðinni. Ef ég man rétt var uppi umræða um að líðan barna í finnskum skólum væri ekki ásættanleg. Ef þú ert með tölurnar skaltu tékka aðeins á því líka. Því eins og Venni páer orðaði það: Fólk er ekki tölustafir. Það er bókstafir. 

[Hafsteinn Karlsson, 21.2.2007 kl. 21:05]

Finnar komu mjög illa út úr könnun sem WHO gerði á líðan barna og unglinga. Þeir hafa sjálfir miklar áhyggjur af því eða eins og einn sagði við mig: Ég myndi vilja skipta á niðurstöðum PISA og WHO.

[Sigfús Þ. Sigmundsson, 21.2.2007 kl. 21:25]

Þetta er snilldin við svona lifandi vettvang eins og blog.is.  Maður kemur með pistil um menntamál Finna og fær fullt af gagnlegum upplýsingum frá fólki sem hefur vit á málunum.  Mjög áhugavert þetta með líðan nemenda....