Tek hattinn ofan fyrir ríkisstjórninni!

Ég vil hrósa ríkisstjórninni fyrir þetta skref sem hún er að stíga með því að samþykkja frumvarp sem ætlað er að hvetja til aukinnar notkunar á vistvænum ökutækjum.  Það er margt áhugavert að gerast hér á landi í þessum málum og það er mitt mat að við ættum að ganga enn lengra og ná forystu í heiminum í notkun vistvænna orkugjafa og þróun ökutækja til að nýta þá.  Ef við Íslendingar myndum t.d. koma okkur upp samgöngukerfi sem nýtir eingöngu vistvæna orkugjafa myndi það vekja heimsathygli.   Slíkt verður aldrei gert öðruvísi en í samstarfi við stórfyrirtæki í bílaiðnaðnum eins og gert hefur verið varðandi vetnisvagnana.  Það á að leggja þunga áherslu á að það verkefni haldi áfram og hér verði komið upp vistvænum almenningssamgöngum.

Ísland er þegar farið að vekja mikla athygli fyrir notkun vistvænna orkugjafa og sérstaða okkar er mikil í þeim efnum.  Hér nýtum við heitt vatn úr jörðinni til að hita upp húsin okkar og rafmagn fáum við úr vatnsaflsvirkjunum sem menga ekki en eru þó umdeildar í dag vegna áhrifa á náttúruperlur landsins.    Ég hitti nokkra Bandaríkjamenn á skemmtisiglingu um karabíska hafið í desember síðastliðnum.  Við sátum til borðs með tveimur fjölskyldum alla ferðina og fæstir á borðinu vissu eitthvað um Ísland.  Þau vissu þó flest hvað höfuðborgin héti en heimilisfaðirinn í annari fjölskyldunni vissi mikið um það hversu framarlega við værum í notkun vistvænna orkugjafa.  Spurði hann mig um vetnisverkefnið og sagði öllum á borðinu að Íslendingar væru svo framsýnir að þar væru allir strætóarnir knúðir áfram af vetni.  Mér þótti miður að þurfa að leiðrétta hann í þessu og segja honum og öðrum á borðinu að þetta væri ekki alveg rétt, aðeins hafi verið um 2-3 vagna sem keyrðir voru tímabundið í tilraunaskyni.  En þetta vissi karlinn og hafði mikinn áhuga á að koma hingað til lands til þess eins að skoða hvernig við færum að þessu t.d. með jarðvarmann.

Það er engin spurning að þarna liggja mikil sóknarfæri fyrir okkur Íslendinga sem við eigum óhikað að nýta okkur.....

Ríkisstjórnin vill stuðla að aukinni notkun vistvænna bíla

Athugasemdir

[Gunnar Ásgeir Gunnarsson, 6.3.2007 kl. 16:01]

Það er gríðarlega mikil gerjun í heiminum í þessum efnum og maður áttar sig ekki alveg hvað verður ofan á. Grein sem ég rakst á á vefnum sem mér þykir mjög merkileg og fjallar um að breyta sorpi í olíu. linkurinn er:

http://discovermagazine.com/2006/apr/anything-oil/