78% fjölgun farþega í strætó á Akureyri!

Ég hef áður minnst á ummæli Gísla Marteins varðandi gjaldtöku í strætó, þ.e. hann sagði í viðtali við RÚV að rannsóknir sýni það að gjaldtaka hafi ekki áhrif á fjölda farþega í strætó (sjá nánar hér).  Ég hef nefnt mörg dæmi um mikla fjölgun farþega í bæjum og borgum þar sem gjaldtaka í almenningssamgöngur hafa verið felldar niður.  Nægir í því samhengi að nefna Hasselt í Belgíu, Reykjanesbæ og Akureyri.   Nú voru nýjar tölur að berast frá Akureyri og benda þær til þess að aukningin verði meiri en fyrstu tölur bentu til.   Í frétt á ruv.is segir:

"Enn fjölgar ferðþegum með Strætisvögnum Akureyrar. Fjölgunin var 78% i síðasta mánuði, en var 60% í janúar miðað við sama tíma í fyrra. Það hefur verið frítt í strætó frá áramótum og samkvæmt þessari könnum virðast sífellt fleiri nýta sér þennan ferðamöguleika.

Farþegafjöldi á dag í febrúar var að meðaltali 687 árið 2006 en í nýliðnum febrúarmánuði var meðalfjöldi farþega á dag 1.226.

Að sögn Stefáns Baldurssonar forstöðumanns Strætisvagna Akureyrar hefur fjölgunin orðið á öllum leiðum og á öllum tímum dags."´ Sjá nánar hér.

Nýjustu tölur frá Akureyri benda s.s. til þess að fjölgunin á milli ára sé 78% eftir að gjaldið var fellt niður.   Ekki veit ég hvaða rannsóknir Gísli Marteinn var að vitna til en ég get alla vegana bent á fjölmörg dæmi og rannsóknir um það að farþegum fjölgi mjög mikið við niðurfellingu gjalds í almenningssamgöngur.....

Athugasemdir

[Birgir Þór Bragason, 9.3.2007 kl. 13:38]

Og aldrei meira svifryk á Akureyri. Hvað segir það okkur?

[Sigfús Þ. Sigmundsson, 9.3.2007 kl. 13:43]

Það þarf nú lengri tíma til að sjá áhrif aukningar strætófarþega á hluti eins og svifryk.  Þessi háa tala sem mældist núna gæti stafað af ýmsum þáttum s.s. veðurfari (óvenjumiklum stillum o.sfrv).   Það er grundvöllur í vísindum að draga ekki ályktanir frá einni staðreynd heldur þarf að skoða marga þætti.  

[Birgir Þór Bragason, 9.3.2007 kl. 13:51]

Þetta var nú bara til gamans gert

[Sigfús Þ. Sigmundsson, 9.3.2007 kl. 13:52]

P.S. Tek fram að það hefur aðeins verið ókeypis í strætó í rúma tvo mánuði á Akureyri, gjaldið var lagt niður nú um áramótin.  Það er því ekki sanngjarnt að segja að slíkar aðgerðir hafi engin áhrif á svifriksmengun þegar svo stutt er liðið á reynslutímann.   Svifryk getur líka stafað af mörgum ólíkum þáttum.   Þetta þyrfti allt að rannsaka og vona ég að Akureyrarbær hafi vit á því að rannsaka áhrifin af þessari breytingu með tilliti til margra þátta s.s. bílaeign á Akureyri o.sfrv.   Það er mikilvægt fyrir stjórnmálamenn á höfuðborgarsvæðinu að fylgjast með hvernig gengur og hvaða áhrif svona breyting getur haft á marga þætti. 

[Sigfús Þ. Sigmundsson, 9.3.2007 kl. 13:55]

Ok, skil þig Birgir.  Það er greinilegt að það vantar eitthvað upp á húmorinn hjá mér svona á föstudegi  ;)

[Birgir Þór Bragason, 9.3.2007 kl. 14:19]

Það er nú annars oft þannig að menn hrapa að niðurstöðum. Því miður er það nokkuð algengt hjá þeim sem eru í pólitík, sennilega kemur það til af því að þeir halda (eða vita) að kjósendur gleyma fljótt. 

[Sigfús Þ. Sigmundsson, 9.3.2007 kl. 14:24]

Já, satt er það.  Það er t.d. endalaust hægt að leika sér með tölfræði og tölur.  Sumir eru meira að segja meistarar í því....