Eru nýju framboðin of sein að koma fram með lista?

Nú eru tæpir tveir mánuðir til kosninga og enn hafa hin tvö nýju framboð, Íslandsflokkurinn og aldraðir og öryrkjar, ekki komið fram með lista.  Það tekur alltaf tíma fyrir ný framboð að stilla saman strengi og ná eyrum kjósenda og því spurning hvort þessi framboð séu að brenna inni á tíma.   Mikið starf er framundan og því fyrr sem þessi framboð koma fram sem fullmótað stjórnmálafl með listum í öllum landslutum því betra fyrir þau.   Persónulega myndi ég segja að ef framboðin verða ekki tilbúin með lista sýna í næstu viku og kynna þá framboðin með pompi og prakt þá muni þau tapa með hverri vikunni sem líður eftir það.  

Forvitnilegt verður að sjá hvort af þessum framboðum verður og þá hverjir skipa sætin á listunum.  Fyrr en það gerist er ómögulegt að spá fyrir um styrkleika þessara framboða og áhrif þeirra á fylgi annarra flokka.....

Athugasemdir

[Helgi Jóhann Hauksson, 15.3.2007 kl. 01:42]

Fólk hreyfst af kraftinum, dugnaðinum ákefðinni og framtaksseminni í Ómari, en svo hafnaði hann tilbúnu framboði Framtíðarlandsins og tekur svo sjálfur allan þennan tíma í kjölfarið að ná saman framboði, það tjáir því hið gagnstæða við ímyndina af honum þ.e. ráðleysi, dugleysi úrræðaleysi og skort á póltískum myndugleika og framtakssemi. Hvort sem svo er eða ekki í reynd valda þessar tafir því aðþað fjarar undan möguleikum Ómars og co. Mómentið þeirra er komið og liðið, - því miður.

[Ásthildur Cesil Þórðardóttir, 15.3.2007 kl. 10:00]

Mér skilst nú að Margrét hafi undir höndum félagaskrár Frjálslynda flokksins, svo það ætti að auðvelda þeim verkið. 

[Sigfús Þ. Sigmundsson, 15.3.2007 kl. 10:30]

Ok, þannig að þú vilt meina að hún fari markvisst í það að höggva skarð í raðir Frjálslyndra með úthringingum?