Jóhannes í Bónus beitir sér gegn Birni Bjarnasyni

Jóhannes í Bónus er með heilsíðuauglýsingu á bls. 49 í Fréttablaðinu í dag.  Þar hvetur hann alla Sjálfstæðismenn í Reykjavíkurkjördæmi Suður að strika yfir nafn Björns Bjarnasonar dóms- og kirkjumálaráðherra.  Hann undirstrikar það að hann sé Sjálfstæðismaður en sé á móti mönnum eins og Davíði Oddssyni og Birni Bjarnasyni (hvað þarf eiginlega mikið að ganga á svo menn hætti að kjósa Flokkinn?).

Það verður að segjast að svona heilsíðuauglýsing frá einstaklingi er harla óvenjulegt innlegg í kosningabaráttuna en nú er að sjá hvaða árangur hún ber. 

Hér er texti auglýsingarinnar í heild:

"Strikið yfir siðleysið

- áskorun til sjálfstæðismanna í Reykjavíkurkjördæmi suður

Í rúm fjögur ár mátti ég að ósekju sitja á sakamannabekk í Baugsmálinu svokallaða vegna óvæginna og ranglátra aðgerða Haraldar Jóhannessens, ríkislögreglustjóra, Jóns H. B. Snorrasonar, saksóknara, og síðast Sigurðar T. Magnússonar, sem var settur í starf Jóns H. B. Snorrasonar eftir að hann var gerður afturreka með málatilbúnað sinn haustið 2005. Nafn mitt var hreinsað með sýknudómi Hæstaréttar Íslands í janúar á þessu ári.

Björn Bjarnason, dóms- og kirkjumálaráðherra, hefur í ræðu og riti varið embættisafglöp þessara manna og hvatt þá til dáða leynt og ljóst. Fram hefur komið í fjölmiðlum undanfarna daga að Björn hyggist skipa Jón H. B. Snorrason í embætti ríkissaksóknara strax að loknum kosningum. Embættisveitingar Björns hafa verið harðlega gagnrýndar á undanförnum árum. Nú keyrir um þverbak og maður hlýtur að spyrja: Hvað skyldi Jón H. B. Snorrason eiginlega hafa á Björn Bjarnason úr því hann hyggst skipa manninn í þetta háa embætti þrátt fyrir allt hans klúður?

Sjálfur hef ég ávallt litið á mig sem sjálfstæðismann þó að ég hafi átt bágt með að styðja flokkinn síðustu árin í stjórnartíð Davíðs Oddssonar. Ég veit að margir sjálfstæðismenn eru sama sinnis og ég í því efni og eiga erfitt með að ákveða sig og þá ekki síst sjálfstæðismenn í Reykjavíkurkjördæmi suður þar sem Björn Bjarnason situr í öðru sæti á lista Sjálfstæðisflokksins. Aðeins eitt ráð er til. Merkið x við D en strikið yfir siðleysið með því að strika yfir nafn Björns Bjarnasonar á listanum.

Jóhannes Jónsson,

kaupmaður í Bónus og sjálfstæðismaður.

JÓHANNES JÓNSSON KOSTAR ÞESSA AUGLÝSINGU SJÁLFUR"