Áhugaverð ESB könnun Fréttablaðsins

Niðurstöður könnunar Fréttablaðsins um hug kjósenda til aðildarumsóknar að ESB eru um margt áhugaverðar.  Það áhugaverðasta í þessari könnun er afstaða kjósenda þeirra flokka sem hafa verið hvað neikvæðastir í garð ESB aðildar.

Þannig vilja t.d. 56,9% Sjálfstæðismanna hefja aðildarviðræður, 52,7% Vinstri-grænna og 60% Framsóknarmanna.  Það er því greinilegt að flokksforystan í þessum flokkum er ekki að hlusta á meirihluta flokksmanna í þessum málum.   Almennir flokksmenn vilja fara í aðildarviðræður en Geir, Steingrímur J. og Guðni vilja hinsvegar ekki taka slíkt skref.

Nú þegar atvinnulífið og almenningur í landinu er farið að hallast meir og meir að aðildarumsókn og upptöku Evrunnar er spurning hversu lengi forysta þessara þriggja flokka geta hunsað slíkt og þá sérstaklega vilja sinna eigin flokksmanna.  

Það er spurning hvort að næstu Alþingiskosningar muni snúast fyrst og fremst um aðild Íslands að ESB og hvaða stefna verði þá ofaná hjá Sjálfstæðiflokki, VG og Framsókn.

Athugasemdir

[Ásthildur Cesil Þórðardóttir, 21.4.2008 kl. 11:30]

Já það verður fróðlegt að vita.  En ég er á því að meðan við höfum ekki unnið heimavinnuna okkar í sjávarútveginum og landbúnaðinum, verðum við að bíða með Evrópuaðild.  Við þurfum að tryggja okkur eignarhaldið á fiskimiðunum og jörðunum okkar.  Annað er barnaskapur.